Josef Hader - Krampus lyrics

Jo mei. Dann. Was i a net. Hobns jetzt Frogn? Na wissens wos ma nu mochn kenntn, des gangat si aus. Duan ma zwa Minuten wie wann ma Freind warn. Ja, sogn ma wir san per Du. Na. Sogn ma wir sitzn mitanaund im Beisl, nach da Vorstellung scho. Sie und i. Mir zwa. Gehns jetz kunnt ma foigendes mochn, des höfat ma jetzt. Das ma sogn Sie olle miteinaunda waradn jetzt da Korl – i redat mi leichta. Ha, bitte. Korl foigendes: Da Roland, des wor des Publikum von gestern des wor a totaler Trottl. Na Korl des wor jetzt glogn. Des wor nur dast di gfreist dast da Korl bist. Korl foigendes: I mecht da a klane Gschicht dazön nu. I mecht da die Gschicht dazön, wie i mit sechs Johrn gaunga bin ois Krampus. Ja, do woit i die Madel schreckn vom Nochborn. Die worn nu klaner wie i. Und i hob mi maskiert, mit einer hässlichen Larve, hob ma an Reiserbesen gnuma vo daham, roten Anorak aunzogn und a paar Spüsochn hob i zaumpockt von mir, falls brav san, die Madel vom Nochborn. Und dann bin i gaunga zum Großvatern und hob eam gfrogt ob er vielleicht mitgangat. Wei a weng gfiacht hob i mi a. Des wor daun a Prozession. Vorn wor da Hund, dahinter i, dahinter da Großvater. Außer mir olle unmaskiert. Und die Mama hot gwusst davon und die woit uns wos z'fleiß tuan und hot a Kettn gnuma vo daham, hot sich vieri gschlichn und hot si versteckt hinter am Gebüsch, wo wir vorbei geh mia**n. Und hot g'wort. Und wir gengan vor, des wor so viere Nachmittag aber scho Dämmerung, Anfang Dezember und wir kumman zum Gebüsch und die Mama ra**elt mit da Kettn. Da Hund bleibt steh. I bin nu weiter gaunga, i hobs nu net ghört ghobt. Die Mama ra**elt lauter und macht: Rhhhhh, rhhhhhh. Da Hund hot gwedelt ober i hob ma denkt um Gottes Willen da richtige Krampus is da dahinter, der will si rächen das in nochmoch und i reiss die Maskn owa haus ind Wiesn los in Besn falln Spielzeug falln drah mi um, teufel ham, i hob fost in Großvater umgrennt, hob gor net gsegn das er locht. Im Hamrenna hob i ma nu in rotn Anorak auszogn und a ind Wiesn ghaut, damit sozusogen jedes Beweismaterial beseitigt wor. Da Papa is gstaundn beim Hoftor, der hot dazöt wie i einigrennt bin ins Haus hob i scho zum beten aungfaungt, ganz laut. Do wor i von da Oma instruiert, net wie ma si verhält in solchen Situationen. Und i bin daun gsessn in da Kuchl, aneinhalb Stund unterm Tisch, hob laut Rosenkraunz bet, und hob mi net vira draut. Korl, wast - mehr kau ma net sogn. Korl, Servus.