Joana Emetz - Under der linden lyrics

Under der linden An der heide Dâ unser zweier bette was Dâ muget ir vinden Schône beide Gebrochen bluomen unde gras Vor dem walde in einem tal Tandaradei Schône sanc diu nahtegal Tandaradei Ich kam gegangen Zuo der ouwe Dô was mîn friedel komen ê Dâ wart ich enpfangen Hêre frouwe Daz ich bin sælic iemer mê Kuster mich? Wol tûsentstunt Tandaradei Seht, wie rôt mir ist der munt Tandaradei Dô het er gemachet Alsô rîche Von bluomen eine bettestat Des wirt gelachet Inneclîche Kumt iemen an daz selbe pfat Bî den rôsen er wol mac Tandaradei Merken, wâ mirz houbet lac Tandaradei Daz er bî mir læge Wessez iemen Nû enwelle got! - Sô schamt ich mich Wes er mit mir pflæge Niemer niemen Bevinde daz, wan er und ich Und ein kleinez vogellîn Tandaradei Daz mac wol getriuwe sîn Tandaradei Tandaradei Tandaradei