Bap - Asphaltpirate lyrics

Nightliner noh Bremen, platte Wallachei, widder ens Fröhnebel, Autobahn noch frei, Thermoskanne - Kaffee, vill zo vill jerauch, ejal für wer mer arbeid, miehstens vill zo winnisch Schloof. Nä, Jeld ess et bestemp nit, wiesu mer dä Job mäht. Joot, aff un zo schon, kütt drop ahn, für wer mer fährt. Kenns jede Hall usswendisch, jed'Brett vun jeder Bühn, jed' Echo, jed' Akustik, weiß wo et Probleme jevve künnt. Manchmohl sinn paar Jeseechter dir he un do vertraut. En Zicklang hattste'n jeder jrößre Stadt en Braut. Eintaachsfleeje hässte Jeneratione övverlääv, un du spürs janz jenau, wer cool ess un wer nur su deit . Teddy, jrööß mir die Junge, dä Ress vun dä Crew, die Nas' un dä lange Blonde un och dä Klein uss Peru. Jrööß mir die janze Kraade, dä Jagger, dä Fesch, jrööß die Asphaltpirate, ich denk off ahn üch. Teddy, ahle Cowboy, Söldner, Legionär, dat sich uns Wääsch zoletz jekrüzz hann ess jetz eez'e paar Daach her. Ich stund em Publikum, du kunnts mich kaum en all dä Minsche sinn, un ich woss och nur, dat du do sinn mohts, wäje dä Fahn nevve dä Bühn, dä schwazze met dämm Schädel un ich woss dir jing et joot. Die trickste nämlich nur huh, wenn sich et Zohühre lohnt. Teddy, jrööß mir die Junge, dä Ress vun dä Crew, die Nas' un dä lange Blonde un och dä Klein uss Peru. Jrööß mir die janze Kraade, wo immer ihr sitt, jrööß die Asphaltpirate, bahl wöht et widder su wigg