En dämm Augebleck, wo plötzlich alles leis ess,
allein, endlich keiner mieh jet vun dir will,
frööchs du dich off, wo du jraad op dinger Reis bess,
oder ob du't nit bemerk häss, lang ald durch bess durch et Ziel.
Et ess dunkel öm dich römm un dat ess joot su,
weil dä Augebleck nur dir ess, dir allein.
Weil dä Zweifel un ding Angst kein Sau jet ahnjeht.
Nä, dä Moment jehührt endlich ens dir allein,
dir allein, nur dir allein.
Nur en dämm Augebleck bess du en dir doheim.
Et kütt vüür, dat du en dämm Moment en Stemm hührs,
die zwar nit do sinn kann, doch der du jähn vertraus,
die du off verleugnes, obwohl se dich dohin führt,
wo du hinjehührs, die dich total durchschaut.
Jraad weil du dä bess, dä säht, dat et lang her ess,
dat du - usser ahn Musik - ahn jet jegläuv,
och wenn du vun Missionare 'n Allergie kriss,
Mann, en dämm Augebleck bess du met dir allein.
Janz allein, met dir allein.
Nur en dämm Augebleck bess du en dir doheim.
Wenn 'ne Hoffnungsschimmer funkelnd zeich, wo't langjeht,
wenn du einsam, rootlos ahn 'ner Kreuzung stehs,
bess dä Wecker klingelt oder ir'ndne Hahn kräht,
en Siren jeht, jottweiswo en Turmuhr schläht,
bess du allein, met dir allein.
Nur en dämm Augebleck bess du en dir doheim,
en dir doheim, en dir allein,
nur en dämm Augebleck (nur en dämm Augebleck)