Komen ist uns eine liehtiu ougenweide
Man siht der rosen wunder uf der heide
Die bluomen dringent durch daz gras
Wie schone ein wise getouwet was
Da mir min geselle zeinen kranze las
Da mir min geselle zeinen kranze las
Nu ist der küele winder gar zergangen
Diu naht ist kurz, der tac beginnet langen
Sich hebet an ein wünneclichiu zit
Die al der werlde vreude git
Baz gesungen nie die vogel e noch sit
Baz gesungen nie die vogel e noch sit
Komen ist uns eine liehtiu ougenweide
Man siht der rosen wunder uf der heide
Die bluomen dringent durch daz gras
Wie schone ein wise getouwet was
Da mir min geselle zeinen kranze las
Da mir min geselle zeinen kranze las
Der walt hat siner grise gar vergezzen
Der meie ist uf einen grüenez zwi gesezzen
Er hat gewunnen loubes vil
Bint dir balde, trutgespil
Du weist wol, daz ich mit einem ritter will
Du weist wol, daz ich mit einem ritter will
Daz gehörte der mägde muoter tougen
Si sprach "behalde hinne vür din luogen
Din wa*kelmuot ist offenbar
Wint ein hüetel um din har
Du muost an die dinen wat, wilt an die schar
Du muost an die dinen wat, wilt an die schar."
"Muoter min, wer gap iu daz ze lehen
Daz ich iuch miner waete solde vlehen
Dern gespunnet ir nie vadem
Lazet ruowen solhen kradem
Wa nu slüzzel?, sliuz uf balde mir das gadem
Wa nu slüzzel?, sliuz uf balde mir das gadem."
Diu wat diu was in einem schrin versperret
Daz wart bi einem staffel uf gezerret
Diu alte ir leider nie gesach
Do daz kint in kisten brach
Do gezweic ir zunge, daz si niht ensprach
Do gezweic ir zunge, daz si niht ensprach
Dar uz nam sie das röckel also balde
Das was gelegen in maniger kleinen valde
Ir gürtel was ein rieme smal
In des hant von Riuwental
Warf diu stolze maget ir gickelvehen bal
Warf diu stolze maget ir gickelvehen bal