Tho tinda achiem arom gi bao makanera Omiyo agoyo erokamano ne wuon osimbo mondo ogwedh yore oganda Ayaye ruodhwa ma odak apanda Piny otimo buya,omiyo arito puodhega kod kwiri mayore Onganda tho e tuoche,dhier kod mahundu Chuny dhano otimo adhola Lwet dhano otimo chilo gi nek Nyiego rach omiyo ayie gi adiera Ochuka ndalo duto nyaka thona Ayaye wuod nyakach,asumo paro matut sama agoyo luth e piny kamanyo rieko Osiepa riekoni tut,nyakwar ochuka wiye bith Dine onge in nyakwar japicha,fuwo dotieka Omiyo apidhoni osimbo ka asungi gi hera "Nyadundo wuod nyakach,ne ok ayudo pesa madabiagoni go erokamano omiyo nenaonge yweyo." Ndalo biro narwaki gi hera ka wawinjo wende winy Niriyo koda samane piny otho kendo dum buru Nene imiya pii sama kech ne tieko oganda Osiepe ber, mwandu gi dinarii rumo Sani nyathi nyaguok maniweyo ema koro giyo Alor mos Nyakwar orony ogwal awer to dhiang' layo e pii Wagala gala kata ka koyo marach chwowo dendwa Ndalowa ok ne rum chuth e kalenda Imiyo asumo rieko ma igoro mana e muma Ayaye Ochuka rit kalambi Ran gunde thoth kendo kelo taabu Nipuonja ni jal mofuwo chalo mana gi puodho motimo kite Rieko ber, galamoro tinde winjowa ka watuak e buge gi thumbe maonge mise Ngire Ochuka,janabii omin Awuor Dasungi nade japuonjna. Kogwen nyidho mol kalor e wi ot Chunya nimo e aoche mak dwuon Dwond winy kod akuche Osoke gedo ka winjo twak udhwe Piwang'a chwer kapari baba Dak ni gona sime ang'e kaka idhi Kibaji goya kendo aluor sama oganda manyi to ok yudi Jarieko koro ere,osiepa onge Sama iling' to chunya ridore Polo piachore Pasia yiech kinde,jatwak na opondo kure Jo thum sungo nyiri magihero kata josiasa An asungo osiepa,tacha makwang'a sama piny ojwang'a Koth goya kamanyi abworo e tie ng'ou Arang koni gi kocha, ah wang'i ere? Piny obalo,winy dibed dhano.. Chunya chur kendo an gi midekre Bang chiemo en kuyo,ipondo kanye? Piny agonda osiepna Kuthe chwowo chunya kod kiewo Alwor, sama apari e lek Masira muofu,tinendeni tuogiye pacho Wayor aora dipo ka nyang' ohum nono Yien achiel jadhing' hiro,piny lich koda Omiyo adhum adimba,nimiyo ang'eyo ni rieko en okumba Ka chandruok oneno,pachi emane jiwa Pod atin alak ,pacha pod nigi chilo Kionge to ngimana tuk ajua Pap odong' tenge apari kaneno opich adhula Rieko sumore,sama dhier loka misumba Piny rabora,kel otit mach omenyna alokora muofu Chula nimo to an e dier nam Kibaji nega sama akwang' to nam otimo apaka Osiepa olal kure? Kik iweya e lak wahundu Ambus marach odakie lep maohero chamo richo Chunyi donge ler pile chalo soko Aluor kendo ajok gi piny sama awinjo ni dendi nimo e masinde machung' apoya Jashairi wang'e lando,ong'er arach to mago duto okadewo Achiemo kenda,ojoga kendo osina ka lak mojogore gawayo Omiyo aparo nene,duog itera bayo Sigana bor,luya chotna sama aparo kindewa Buge wer,kodh olemo,odichieng kod mudho mandiwa Pi wang'a luoka kaparo wi got Nyabondo Owada piny ru gi mare Wuoyi siro,nyakwar japlan Hera mari kweyo chunya sama lwenje ger Sulwe miel sama andikoni hera Piny oling' dhi kendo dwe rieny Ochuka apukoni wino e kitapa mar wer nikech nenigena Wuoyi moluoro chilo,ma e kaka agido juoki Wuoyi ma tek ta,ipimo mana gi chumbe Mesaya koro owiti e kitanda mar midikre Anachom kure? Kwach wang'e tindo,chiewo Nyadundo marakuthe Liech kidhanji,ayaye jowi jamirima Piny oti, bi igwedh chunya gi zaburi gi ngeche Jaber ywakni tin,nyaka tich adi na rwak wendo? Timbeni makare emane miya kwe Piny galagala wang'e okolo kuth konga Piny oruko kendo hera oner Jonabii kod Nyiseche manono Omondi koth machwer ne jochan Bi ipuonj oganda. Aheri gi chunya te. NB: For Omondi Ochuka, My brother who has been battling cancer _ I know one day we will win.