Marzo: 'nu poco chiove
E 'n'atu ppoco stracqua.
Torna a chiovere, schiove,
Ride 'o sole cu ll'acqua.
Mo 'nu cielo celeste,
Mo 'n'aria cupa e nera.
Mo, d' 'o vierno, 'e ttempeste,
Mo 'n'aria 'e primmavera.
Marzo: 'nu poco chiove
E 'n'atu ppoco stracqua.
'N'auciello freddigliuso
Aspetta ch'esce 'o sole.
'Ncopp' 'o tturreno 'nfuso
Suspirano 'e vviole.
Catarì, che vuò cchiù?
'Ntienneme, core mio!
Marzo, tu 'o ssaje, sì tu
E 'st'auciello songh'io.
Marzo: 'nu poco chiove
E 'n'atu ppoco stracqua.