Wynter wakeneth al me care,
Nou this leves waxeth bare;
Ofte I sike and mourne sare
When hit cometh in my thoht
Of this wourldes joie, hou hit geth al to noht.
Nou hit is and nou hit nys,
Also hit ner nere ywis;
That moni mon saith, soth hit ys:
Al gothe bote Godes wille,
Alle we shule deye thah us like ylle.
Al that greine me graueth grene,
Nou hit faleweth albydene:
Jesu, help that hit be sene,
Ant shild us from helle!
For y not whider
I shal ne hou longe her duelle.