In so hoher swebender wunne
so gestuont min herze ane vröiden nie
ich var, als ich vliegen kunne
mit gedanken iemer umbe sie
sit daz mich ir trost enpfie
der mir durch die sele min
mitten in daz herze gie
Swaz ich wunnecliches schouwe
daz spile gegen der wunne, die ich han
luft und erde, walt und ouwe
suln die zit der vröide min enpfan
Mir ist komen ein hügender wan
und ein wunneclicher trost
den min muot sol hohe stan
Wol dem wunneclichen maere
daz so quoze durch min ore erklanc
und der sanfte tuonder swaere
diu mit vröiden in min herze sanc
Da von mir ein wunne entspranc
diu vor liebe alsam ein tou
mir uz von den ougen dranc
Saelic si diu süeze stunde
saelic si diu zit, der werde tac
do daz wort gie von ir munde
daz dem herzen min os nahen lac
daz min lip von vröide erschrac
un enweize von liebe joch
waz ich von ir sprechen mac