De Puch quarkt int Rohr
De Voß bru't int Moor
Un wit inne Feern schallt Gesank
Min Hart stiggt to Höch
Ik weet ni, wa'k seeg
De Thran'n löpt de Backen hentlank
De Dag geit to Rau
Opt Gras liggt de Dau
De Wulken ann Himmel warn roth
Dat Allens so still,
Ik weet nich, wa'k will
Ik glöv, mi is truri to Moth
Dar achter de Weid
Wit oever de Heid
Dar schimmert ann Himmel aen Moel
Dat is mi, as weer
Ik dar voer de Doer
Un seet oppen Moelnbarg un spel
De Dag geit to Rau
Opt Gras liggt de Dau
De Wulken ann Himmel warn roth
Dat Allens so still,
Ik weet nich, wa'k will
Ik glöv, mi is truri to Moth
Denn seeg dar en rut
Un den kenn ik so gut
Den seet ik so oft oppen Schot
De Steen leep un klung
De Mann seet un sung
Ann Himmel de Wulken weern roth
De Dag geit to Rau
Opt Gras liggt de Dau
De Wulken ann Himmel warn roth
Dat Allens so still,
Ik weet nich, wa'k will
Ik glöv, mi is truri to Moth
Dar weer ik noch kleen
Un nun bün ik alleen
Wer weet, ob de Ol dar noch steit?
De Lucht is so luri –
Dat Leed is so truri
Gottlof, dat de Moel doch noch geit!
De Dag geit to Rau
Opt Gras liggt de Dau
De Wulken ann Himmel warn roth
Dat Allens so still,
Ik weet nich, wa'k will
Ik glöv, mi is truri to Moth