بوقطاية ديناصور في سوق أهراس يبني و يطلع فالبنيان
يحب الجدال و أبو نواس مع شوية قصبة و زوج كيسان
عندها زوج معاني و لحديث قياس يا العربان
تلقاه كل سمانة فالجزيرة ، مرة شيتة و مرة فتان
عنده غناية وحدة يبرح فيها في خاطر العديان
أنا ما نحشمش و كيما يقولو أخرج لربي عريان
أنا أتشرف بانتمائي للأفلان
و نعرف مزمان ندير البوليتيك في كل مكان
بوتفليقة دزولنا ربي باش يدينا لبر الأمان
ولي يقلي وراه الأمان نقلو معزة و لو طارت يا إخوان
و لي يقول البلاد مايش مليحة نهبلو بالصماطة و اخزي الشيطان
ولي يسقسيني على البلالمان
نقلو راو يدافع على مصالح المواطن الحيران
ولي يقلي بلي راهم فالشيراتون يشويو فالخرفان
نقولو واش بغيت يموتوا بالشر ولا ياكلوا غير البانان ؟
ولي يقلي راهمك مرقوها ولاو يجيبوا العايلة في مرسيداس طايوان
نلعبها نصايد فالذبان
ولي يقلي لاجونيس قاع يبيعوا فالشمة و الدخان
نقلوا يا حبيبي نتا عايش فالغربة و ما تعرفش واش كان
غا نتا رحت و البلاد ولات أوتوروت و سوبر مارشي و زينة البلدان
و لي يقول لي بلادنا راي في يد الجنرال فلان
نقلو تحبس تم يا عدو لبلاد يا عميل فرنسا و الماريكان
و لي يحكي على المجازر نقولو يا خويا الشعب كره مالإشاعات و هدرة القهاوي و الجرنان
ولي يهدر من المعارضة نقلو سطوب ! دزاير ماهي مصر ولا تونس ولا السودان
و نعلبو الثورات العربية لعاد فيها حبيبي القذافي يقتل و يهان