Ghani Mahdi - Chaal al-nar / غاني مهدي - شعل النار و ڤول الدخان منين lyrics

و دخل فرعون على الشعب و قالهم يا حبابي من نهار سمعت بلّي الماء مقطوع من الصباح لعشية و الله ما رقدت و ما جاني نوم و راني قررت أنا و صحابي باش نجيبولكم سيتارنة ملفوراج كل يوم خرج واحد من بين الناس و قالو يا فرعون راك مرّقتها بزّاف صحابك يعمروا في لي بيسين لكلابهم و يزقيو حقولهم نهار و ليل و حنا ما عندناش قطرة ماء غضب فرعون و قالو شكون نتا يا مُشوّش ؟ قالو أنا موسى من دوّار لحرار دوّار ماتوا فيه الشهداء باش أمثالك يوليو أُمارا على هاذ الأرض و اليوم أولادهم ميتين بالشر و الحقرة لا مدرسة و لا وزين و لا طريق و لا خدمة لا ضو فالليل و لا ماء في النهار و لا رحمة ولادنا هربوا فالفلايك منهم من مات في عرض لبحر و منهم لي ولّى سرّاق و حشّاش فالمدينة رانا عطشانين حرية و كرامة و أنت جاي ليوم تصدق علينا سيتارنة ماء فرعون جنّ جنونو ، و قال للناس عنكم من هذ الإرهابي ! جاء يفسّد علينا قصرتنا و يعمرلكم ريسانكم بالتقراف و الثورة ثار واحد مالشعب و قال لفرعون راك تشعل في النهار و تقول الدّخان منين هذي عشر سنين و أنت تصبّر فينا و عدتنا بالماء ، التريسيتي و الخدمة صحابك ولاّو أغنياء قد الدنيا و حنا كلاتنا الميزيرية غضب فرعون و قالو شكون أنتا يا بوجادي ؟ طوال لسانك ولّيت تعرف تنادي قالو أنا عميروش من عرش تالا إيفاسن صحابك أدّاولي أرضي ذراع و بناو فيها شاطوات لولادهم و أعطاوني بقرة و تراكتور و قالوا لي ولّي غدوة نعطيوك طرف أرض تزرعو البقرة سرقوهالي لي تسمّويوهم لرهاب ، و التراكتور بعت باش نوكّل ولادي لي ماتوا بالشر و الأرض ربي يجيب يا فرعون و الله هاذي مليحوة قالهم فرعون جا زمان تتكلمو على الحرية و الديمقراطية نسيتوا نهار كنتو تترجّاو فيّا باش نولي عليكم ملك نسيتوا نهار كان لرهاب ماسي فيكم كراعو ما تغدروا تحوسوا... ما تغدروا تقصروا فالليل و اليوم بعد ما ضحيت عليكم عمري بنيتلكم جامع قد الدنيا و طريق من الطرف للطرف ! هكذا تقابلوني يا نكّارين الخير ثار واحد مالشعب و قال لفرعون الجامع نتاعك لبخو و أرض الله واسعة ، و الصلاة عالرخام عمرها ما دخلت للجنة و الطريق بفلوس البلاد ، و كل كيلومتر صحابك ادّاو منّو النص يا سيدي حْمار وجه فرعون ، ولّى يرجف من الغضب و قال هذي مؤامرة من الغرب ، راني نشم ريحة أعداء البلاد ور اهذ المكيدة ثارت عجوز و قالت لفرعون صحابك هوما أعداء لبلاد و أنت مولاهم في الثورة كنتوا مدرقين في المغرب و في الاستقلال دخّلتوا المجاهدين للحباس يا خونة شكون نتي قالها فرعون ؟ أنا فاطمة ، ولادي رام فالقايمة تاع الإرهاب باباه قتلاتو "لو.آ.آس" و أولادو قتلتهم الـ "دي.آر.آس" فرعون جمع الوزراء و العسكر و قالهم يا جماعة راي البرمة بدات تغلي و لازم ناخذو قرار باش نحميو مصالحنا و مصالح هذ الشعب نطق وزير الأشغال العمومية و قال لفرعون ما تتحيّرش يا سيدي الشناوة خلاونا شوية مصالح فالحين نفرقوهم على الشعب قالو فرعون ماشي قضية مصالح يا داب لازم نمنعوا أفكار تاع موسى ، عميروش و فاطمة قبل ما يغرسوها في قلوب الناس و يصرالي كيما صرا لصاحبي زنقة زنقة