I do no fors the wheither of the two,
For as you liketh it suffiseth me."
"Thanne have I gete of you maistrye," quod she,
"Sin I may chese and governe as me lest?"
"Ye, certes, wif," quod he. "I holde it best."
"Kisse me," quod she. "We be no lenger wrothe.
For by my trouthe, I wol be to you bothe--
This is to sayn, ye, bothe fair and good.
I praye to God that I mote sterven wood,
But I to you be al so good and trewe
As evere was wif sin that the world was newe.
And but I be tomorn as fair to seene
As any lady, emperisse, or queene,
That is bitwixe the eest and eek the west,
Do with my lif and deeth right as you lest: